Ullut ulapaarfiit qimakkit.

Imminut ilisarileqqigit imaluunniit peeqqat, kammalaatit, aappalluunnit ilagalugu/-git Kalaallit Nunaanni illoqarfiit annersaasa tullianut puigunaatsumik qasuernartumillu angalanissinni ilisarileqqigitsi. Sarfaq Ittummik Nuummiit tallimanngornermi unnukkut aallaritsi, aqqutaanilu pinngortitaq kangerluillu kusanartorsuit misigalugit, Sisimiunullu  tikinnermi Hotel Sisimiuni pitsaasunik unnukkorsiorlutit. Sapaammi illoqarfimmi pinngortitamiluunniit takusassarsiorsinnaavutit naggataatigullu hotelip neriniartarfiani unnukkorsiorlutit. Ataasinngornermi ualikkut Nuup tungaanut aallaraanni  marlunngornermi ullaakkut apuunneq pisarpoq.

Immakkut angalaarnermik nuannersumik takorloorsimanngisannillu misigisaqarit. Umiarsuup cafeteriaani allat nuannisaaqatigisigit imaluunniit ineeqqassinni qasuersaaritsi. Sisimiuni   nammineersinnaavutit, katersugaasivik alakkarlugu imaluunniit illoqarfimmi umimmaat qiviuinik tunisassianik illoqarfimmiut sanaavinik pisiassarsiorlutit.

Aamma sanaluttartut illuat umiarsualivimmiittoq takusarsinnaavat sanalukkanillu assigineqanngitsunik pisiffigalugu. Imaluunniit  atisalersorluariarlutit periarfissat allat apummi  misigisassarsiorfigisinnaavatit.

Piviusut:

Sisimiut 5.500-nik inoqarpoq illoqarfiullu nutaanngitsortaa  nunasiaataanerup pilerneraniit ukiut uuntritillit ingerlaneraneersuulluni.
Illu nutaannginngerpaaq 1756-meersuuvoq. Maluginiagassallu ilagaat oqaluffik tungujortoq, 1775-mi atulersimasoq. Oqaluffik 1771-mi illoqarfimmi ilagiit kalaallit akilerlugulu sanasassanngortippaat. Piffiit assigiinngitsut oqaluttuassartallit misigikkit, eqqissisimaarit,  unnuilluunniit pisoqarfiulluartut akuuffigalugit.

Akia inummut ataatsimut kr. 2.995,-

Akimut uku ilaareerput:
• Umiarsuarmi ineqateqarluni ilaaneq siumut utimullu.
• Hotel Sisimiuni ineqateqarluni unnuinerit.

• Saapaammi ataasinngornermilu ullaakkorsiorneq.

• Hotel Sisimiuni tikinnermi aamma aallalernermi unnukkorsiorneq

Uku immikut akiliilluni pineqarsinnaapput:
• Umiarsuarmi hotelimiluunniit ini kisimiittariaq kr. 400,-
• Immikkut misigisassarsiornerit
• Meeqqamut akia kr. 2.340,-
Angalanissamut bilitsi aallarfissaq kingusinnerpaamik ullunik 14-nik sioqqullugu pisiarineqassaaq.