Ilaasunik nassatanillu angallassinerit ingerlanneqartarput Arctic Umiaq Linep angallassinermut aalajangersagai malillugit. Uani angallannermut aalajangersakkat takukkit.

Aasaanerani ulapaarfiunngitsumilu akit

Ulapaarfiunngitsumi: 1. januaari - 31. maaji, 1. septembari - 31. decembari
Aasaanerami: 1. juuni - 31. auugusti

Inniminniineq - billetsit

Billitsimik inniminniineq sullissisugut aqqutigalugit pissaaq imaluunniit ugguuna Online Booking. Ilaasussat inissamik inniminniisimanngitsut inissaqarpat tamaallaat ilaasinnaapput.

Ilaasut pisinnaatitaapput angalanermik aqqutaa tamakkinngikkarluarlugu unitsisinnaallugu. Angallavissap sinneranut angalanisamut akiliutigisimasaq utertinneqarsinnaavoq imaluunniit angalaneq nangeqqinneqarsinnaalluni ullup aallarfissaagaluaq qaamammik ataatsimik qaangertinnagu. Angalaneq aqqutaa tamakkinngikkarluarlugu unitsinneqarpat billitsi umiarsuup allaffiani naqitsivigineqassaaq.

Sarfaq Ittuk-mut ikinermi billitsisisoqarpat sullissinermut tapiliut kr.. 150 akilerneqassaaq.

Angalanissamik taamaatitsineq

Billitsinik pisinermi akiliutigisimasaq utertinneqarsinnaavoq aallarfissaq sioqqullugu taamaatinneqarsimappat. Taamaattorli ataatsimoorluni angalanerni malittarisassat
immikkut ittuupput, tamakku pillugit pisiffiginikuusat saaffigiuk.

Billetsimik akiinik utertitsineq

Billitsit atorneqarsimanngitsut utertinneqarsinnaapput ulloq aallarfissaagaluartoq kingusinnerpaamik qaammat ataaseq qaangiutsinnagu.

Nerinermut billetsit utertinneqarsinnaanngillat.

Bilitsip akia utertitsinneqarsinnaavoq angalanissaq sioqqullugu taamaatinneqarsimappat. Utertitsinermi inummut ataatsimut angalanerup isorartussusianut ataatsimut akiliutigitinneqassaaq 75 kr.-nit.

Angalanissap taamaatiinnarnera nalunaarutigineqarsimanngippat billitsip akiata affaa utertinneqassaaq.

Tuniniaanermi aamma kortit akiliissutit atoneqarnerannut aningaasartuutit utertinneqarsinnaanngillat.

Nassatat

Ilaasut ataasiakkaat tamarmik akeqanngitsumik 30 kiilu tikillugu nassataqarsinnaapput. Nassatat tassaassapput angalanermi nassartakkat nalinginnaasut kuffertit, pooqattat, poorsuaq assigisaalluunniit.

Nassarsinnaasat saniatigut nassatat umiarsuakkut nassiussinermi akit qaqugukkulluunnit atuuttut tunngavigalugit nassiunneqarnissaat innersuunneqassapput.