Maniitsoq qeqertamiippoq 2.700-t missaannik inoqartoq. Eqqaa aalisagarpassuaqarfiuvoq, aasaaneranilu arferit takussaasaqalutik. Maniitsup eqqaaniipput sisorariartarfiit pissanganartut. Aatsaat ukiuni kingulliunerusuni tamanna nunanit tamalaanit ilisimaneqaleriartorpoq. Illoqarfimmiit 25-30 kilometerisut ungasitsigisumiipput Apussuit Adventure Camp. Sisoriartarfik sermimut 1000 meterisut portutigisumiittumut toqqaannartumik atasoq.

Sisorariartarfimmi arlalinnik illuaraqarpoq. Helikopterimik sisorariarnissamut imaluunniit qamuteralannik sisorariarnissamut periarfissaqarluarpoq. Maniitsumi ujakkaarluni sisorarnissamut aqqutissaqarpoq sukisaarsaarutigalugu aamma pikkorivissunut sisorartartunut. Aasakkut aalisariarnissamut periarfissaqarluartarpoq. Kangia Campimi aliikkutaralugu aalisariartarfeqarpoq akimarpasilluinnartumik, tamaani eqalunnik pisaqartoqarsinnaasarluni. Piniariarnissamut periarfissaqarpoq, trekkingernissamut (ilungersuussilluni angalaneq) imaluunniit illoqarfimmi eqqissisimanartumi ilorrisimaarniaraanni aamma tamanna periarfissaalluni.

Kulturikkut oqaluttuarisaanermut tunngassuteqartumik katersugaasiveqarpoq, taanna Illunnguani iliveqarfitoqqap kusanartup eqqaanniippoq. Katersugaasivik eqqumiitsulianik katersanik amerlasuunik peqarpoq. Tassaniipput aamma illut pisoqqat, qanga saffiorfiusimasoq, iffiorfiusimasoq, immiorfiusimasoq aamma niuertup allaffigisimasaa.