Narsami innuttaasut 1.700-t missaanniipput. Illoqarfik narsaamanerujussuarmiippoq, taamaattumik Narsamik atserneqarpoq.

Illoqarfiup eqqaaniittut kangerluit puisinik aamma aalisakkanik ulikkaarput. Aalisariartoqarsinnaavoq suluppaakkamik imaluunniit saarullimmik pisaqarnissamut periarfissagissaarluni. Eqqaa ilisimaneqarluarpoq eqalunnik kusanartunik kangerlunni peqarmat.

Sermit iigartartut pissutigalugit illoqarfiup eqqaa iluliaqartuaannarpoq. Illoqarfimmiippoq katersugaasivik, eqqaanniillutik illut oqaluttuarisaanermut ilaasut. Tassaniipput soorlu Orsivik, Henrik aamma Malene Lundip illuat aamma tassaniillutik. Illu taanna katersugaasivittut ammarneqarpoq illoqarfiup 1980-imi ukiunik 150-inngortorsiorneranut atatillugu. Maannakkut taalliortumik ilisimaneqarluartumik, erinniortumik, politikerimik, eqqumiitsuliortumik aamma palasimik Henrik Lundimik eqqaassutissatut atorneqarpoq.

Orsivik 1848-mi napparneqarpoq, nioqqutissanut toqqorsivittut, taamanikkut KGH-p (Kongelig Grønlandske Handelip) illoqarfimmi piniartunit pisiaanut, atorneqarpoq.

Aasakkut Narsap eqqaa naasorpassuaqartarpoq qorsooqqissivittartumik. Narsap eqqaani aamma savaatillit arlaliupput, soorlu aamma arlaqartut nunaateqarnermik ingerlataqartuusut.

Pisulluni sivisuumik sivikinnerusumillu angalaarnissamut periarfissaqarluarpoq. Kuannersuarnut pisuttuarit – tamaani nunap sannaa nalissaqanngitsuuvoq. Nunap tamassuma ilisimaneqaatigaa qaqutigoortunik pinnersunillu mineraleqarnera ujaraqarneralu. Tamaani ilaatigut takussaapput tugtupit aappalaartoq, Nunatsinni ujaqqatut ilisarnaatitut isiginiarneqartartoq.