Nuuk Kalaallit Nunaanni illoqarfiit annersaraat 16.000-inik inoqarpoq. Illoqarfik 1728-mi tunngavilerneqarpoq ajoqersuiartortitamik danskimik-norgemiumik Hans Egedemit. Illoqarfiit pingaarnersaanni Namminersorlutik Oqartussat qullersaqarfeqarput tamatumalu saniatigut illoqarfik politikikkut aamma kulturikkut qitiuvoq.

Nuuk illoqarfittut allatut angisuutut nutaaliaasutut ippoq cafénik peqarluni, illup iluani naluttarfeqarpoq, kulturip illorsuaq Katuaq tamaani café lattemik najoqqaasoqarsinnaavoq imaluunniit 3D-imik filmertoqarsinnaalluni. Aammattaaq illoqarfiup pisoqartaanut pisuttuartoqarsinnaavoq – aamma Nuutoqqamik taaneqartartumut. Tamaaniipput napparsimavitoqaq, Annaassisitta Oqaluffia, Hans Egedemut eqqaassutissiaq aamma Hans Egedep illua. Illu 1728-meersuusoq ullumikkut Namminersorlutik Oqartussanit ilassinnittarfittut atorneqarpoq. Kalaallit Nunaata oqaluttuarissaanera soqutigigaanni Nunatta Katersugaasivianut ingerlasoqarsinnaavoq tamaanilu katersugaatit assigiinngitsut takuniarlugit, tamakku kalaallit oqaluttuarisaanerannut takussutissaapput aamma timit paniinnarsimasut Qilakitsumi nassaat takuneqarsinnaapput. Inuit toqungasut timaat paniinnarsimasut nunaqarfiusimasumi Qilakitsumi Uummannap kangerluani 1972-imi nassaarineqarput.
Aammattaaq Eqqumiitsulianut Katersugaasivik Kalaallit Nunaanni katersugaasivik namminersortumik pigineqartutuaq takusarneqarsinnaavoq. Tamaani ilaatigut Emanuel A. Petersenip qalipagai takuneqarsinnaapput aamma immikkut illuinnartut kalaallit eqqumiitsuliortut qalipagai, imilertakkanik qalipakkat titartakkallu takuneqarsinnaapput.