Ilisimassallugit iluaqutaasut

M/S SARFAQ ITTUK 1992-imi sananeqarpoq nutarterneqarlunilu tallineqarpoq.1999/2000 ukiukkut.

Maannakkut 73 meterinik takissuseqarpoq 11 meterinillu silitsigaluni. Motooreqarpoq 2000 HK-nik 13 knobinillu sukkassuseqarluni ingerlaarsinnaavoq.

Umiarsuarmiipput Cafe Sarfaq, aquani isersimaartarfik avammut isikkivillik aamma meeqqanut pinnguartarfeqarpoq quleriit aappaani

Umiarsuaq 238-inik ilaasoqarsinnaavoq inuttaalu 22-upput.

Unnuinissamut periarfissat imatut agguataarneqarput initani uffarfilinni aamma perusuersartarfilinni  innarfissat 104 aamma ammaannartuni 134-inik innangaffissaqarpoq.

Umiarsuaq Det Norske Veritasimit akuerisaavoq imaani sikoqartuni angalasinnaanermut.

Umiarsuarmut nalunaarsuutit uani takukkit.

Umiarsuup qaavani 1, 2 aamma 3-mi nassatanut inissiiffissaqarpoq ilaasunut ammaannartuniittunut atugassaasunik.

Umiarsuarmi internet-mut attavilernissamik minutsini 30-ni sivisussusilimmut dkk. 50,- akiliillutit Café-mi pisisinnaavutit.

Arctic Umiaq Linemit isumannaallisaaneq pingaartilluinnarneqarpoq tamannalu Sarfaq lttummi ilaanermi, ulluinnarni assigiinngitsutigut malugineqarsinnaavoq. Inuttat sungiusimasarivaat piffissaq tamakkertugu isumannaallisaanermi piumasaqaatit sakkortunerpaat aamma nalinginnaasut tunngavigalugi sungiusartarneq aamma iliuuseqartarneq. Inuttat ilinniarluarsimasuupput Kalaallit Nunaatalu sineriaani inunni ilaasoqarfuni angallaneq annertuumik misilittagaqarfigalugu. Piffissap ilaani ilaasunit misigineqartassaaq ikkuallattoornissamut aamma isumannaallisaanermut sungiusartoqarnera. Sungiusartarnerit pisariaqartuupput sapinngisamik inuttat annertunerpaamik misilittagaqalernissaannut, arlaatigut ajornartorsiornermik pisoqassagaluarpat.

Sarfaq Ittuup iluani pujortartoqaqqusaanngilaq.

Umiarsuup qaavani silami 4 aamma 5-mi aaliangersimasunik ilisarnaqqusersimasuni pujortartarfeqarpoq.

Umiarsuarmi inuttat sukkuluunniit pissarsiarisinnaavatit;  tassanngaannartumik pisoqartillugu umiarsuup qaavata 3-anni paasissutissiisarfiup eqqaani toortagaq toorsinnaavat. 

Meeqqanut akikillisaassut-0-inik ukiullit: 100 %
1-inik – 11-inut ukiullit ilanngullugit: Inersimasup akiata 50%-nik.

Utoqqarnut, siusinaarluni sulisinnaajunnarnermut akikillisaassut.

Utoqqalillutik 65-inik ukioqartuniit, siusinaartumillu pensionisialinnut ammaannartuni akikillisaat kisimi atuuppoq piffissami:                            01.januaarimiit – 31.maajimut aamma 01.september- 31.december                akikillisaat 50 %-voq.

Akikillissaat 25%.

Piffissami 01.juni – 31.august ammaannartuni kisimi atuuppoq.

Piffissami 01.juni – 31.august, akikillisaat parnaartartuni atuutinngilaq.

Akigitinneqartunut danskit koruunii (DKK) atuupput, akigitinneqartunut tuniniaanermi akitsuut llanngunneqanngilaq.

Akigitinneqartut allattorsimaffianni kukkusoqarsinnaanera sillimaffigiqquneqarpoq. Akikillisaaffigineqarluni angalanerni uppernarsaasersuutit nassarneqassapput tamatumunnga ilanngullugu utoqqalilluni pensionisiaqamermut allagartaq.

 

Akikillisaatit allat:                                                                                             Angalaneq qaangiutereerpat, kingumoortumik atuutsinneqarsinnaanngilaq.

Sarfaq Ittummi qerititsvimmik soqanngilaq,  thermo karsit marluk, qerisunik ikisiffigineqarsinnaasut quleriit sisamaanniipput, tassaniittuuteqarneq ilaasup/piginnittup nammineq akisussaaffigivaa.

Paarlaattoortoqannginnissaa piniarlugu, pigisatit atinnik allassimasunik nalunaaqutsernissaat innersuunnarpoq.

 

 

Aallaasit umiarsuarmut nassarneqarsinnaapput, ikinermi aquttumut tunniunneqassaaq (eqittaataa peerneqariissaaq)

Angalanermi qimmeq, aamma qitsuk nassarneqarsinnaapput.

(Uumasut allat nassarneqarsinnaanngillat)

Uumasuut ataasiinnaq nassarsinnaavat, taamaattorli angalaneq nalunaaquttap akunnerinik 36-nik sivisunerussanngilaq.

Qimmeq, qitsullu angalanerup nalaani ilaasut isersimaffianneeqqusaanngilaq, ilaasut sapigaqartuusarnerat eqqarsaatigalugit.

Billitsisinermi aamma umiarsuarmut ikilernermi akiuussutissamut kapitissimanermut uppernarsaat atuuttoq takutinneqassaaq.

Qimmeq aamma qitsuk karsimi angallassinissamik akuerisaasumiissapput aamma taamaallaat nassarneqarsinnaapput umiarsuup qaavaniissappata.

Karsi angallassissut akuerisaasoq nammineq akisussaaffigineqarpoq.

Akiliineq: Qimmeq, qitsullu nassarneranut 300,- koruuninik akeqarpoq, umiarsuup paasissutissiisarfiani akilerneqassaaq.

Uumasuutivit sumut inissinnissaa pillugu ikinerni umiarsuarmi sulisut saaffigikkit.

 

Apeqqutissaqaruit, nangaassuteqarnak mailikkut saaffigitigut: info@aul.gl

Meriannguneq ulorianartuunngilaq, pinaveersaartinneqarsinnaavorli, Café Sarfaq-mi “Seabands” pisiarineqarsinnaavoq, merianngunermut illersuutitut tajaliullugu atortagaq.

Nalornissuteqaruit nangaassuteqarnak Café Sarfami sulisut saaffigikkit, ikiunnissaminnut piareersimasarput.

Umiarsuup sananeqaataa, angissusaalu aallaavigalugit umiarsuup ilua issiavimmik kaassuartakkanik atuisuulluni quleriit tikikkuminaalaarsinnaapput.

Issiavimmik kaassuartakkanik atuisumut naleqqussarluakkamik parnaartartumik iniuteqarpugut, taannalu quleriit pingajuanniippoq.

Angalassatilluni, umiarsuaq siusinaarluni ilisimatinnissaa pingaaruteqarpoq.

 

Piffissami juni, juli, august takornarianik nassuiaasartoqartarpoq (guide).

Takornarianik nassuiaasartoq Kalaallit Nunaat pillugu saqqummiissarpoq, illoqarfinni/nunaqarfinni aaliangersimasuni pisuttuartitsisarluni.

Ukioq 2021-mi takornarissanik nassiuaasartumik sulisoqassanngilaq, Covid-19 peqqutaalluni.