Ilaasunik aamma nassatanik imakkut angallassineq tamakkerluni Arctic Umiaq Linep ilaasunik angallassinermut aalajangersagai tunngavigalugit ingerlanneqarpoq. Aalajangersakkat matuma kinguliani allassimasut Arctic Umiaq Line A/S-ip (matuma kingorna AUL) umiarsuaataani imaluunniit attartorsimasaani ilaasunik nassatanillu sukkulluunniit angallassinermi atuupput.
§ 1 Arctic Umiaq Line ilaasumik angallassinissamik isumaqatigiissusiorsimaneq imaluunniit ilaasup ilimagisaa saneqqullugu umiarsuarmik allamik angallassinermik ingerlatsisussamik isumaqatigiissusiorsinnaatitaavoq. AUL imminut pisinnaatippoq ilaasumik ineeqqamik inniminnigaanit allaanerusumik ilaasumit angalanerup ilaani tamakkerluguluunniit inissiisinnaalluni, inniminnikkap suunera aamma ilaasumut atugassaritinneqalertumit suunerata pitsassusia appasinneruppat tamatumunnga taarsiullugu akigitinneqartut naatsorsoreernerisigut assigiinngissutaat utertinneqassaaq.
§ 2 AUL ingerlatsinermi pissusissaanngitsumik pisoqartarneranut akisussaasuunngilaq, imminullu pisinnaatippoq angalanermi pilersaarut aamma bilitsit akii siumoortumik ilisimatitseqqaarnani allanngortissinnaallugit.
Imm. 2 Bilitsit tammarneqarsimasut imaluunniit pisoqalisoorsimasut taarserneqarsinnaanngillat/akii utertinneqarsinnaanngillat.
Imm. 3 AUL-imut bilitsit atorneqarsimanngippata utertinneqassapput ullup aallarfissap kingornatigut kingusinnerpaamik qaammat 1 qaangiutsinnagu.
§ 3 Sikorsuit imaluunniit assigisai pinngortitamik pissuteqartut pisuullutik umiarsuup ingerlaqqinnissaa isumannaatsuusorineqanngippat AUL-ip angalaneq umiarsualivimmi qaninnerpaami unitsissinnaavaa sila/sikut assigisaalu pitsanngorsiillugit tamatumalu kingorna angalaneq kinguaattoorutaagaluartumik nangeqqillugu.
Imm. 2 Sikut imaluunniit assigisaasa akornutaanerisigut AUL aalajangiippat ilaasussaq ikisinnaajunnaarluni, tamanna tunngavigalugu AUL-imut taarsiiffigineqarnissamik piumasaqaateqartoqarsinnaanngilaq. AUL-ip angallassinissamut pisussaatitaaffii aatsaat atuuttarput AUL-ip umiarsualivinni nalinginnaasumik tikittagaani inunnik ikisisinnaagaangat, tamatumunngalu atatillugu piffissaq pilersaarutaasoq malillugu umiarsuaq ingerlaqqissinnaappat. Ilaasussat piffissaq eqqorlugu aallarsimanani akunnittarfinnut assigisaannullu aningaasartuuteqarsimappat AUL-ip tamakku akisussaaffiginngilai.
§ 4 Angallassinermut isumaqatigiissut tunngavigalugu angallassineq tamakkerlugu imaluunniit ilaannaa allanit AUL-imiunngitsumit ingerlanneqarpat, taava AUL ajoqusernermut, annaasaqarnermut imaluunniit kinguaattoornermut, angallassinermi tassani pisuni akisussaassuseqartinneqarsinnaanngilaq angallassineq allamit ingerlanneqartillugu. Taamatuttaaq atuuppoq angallassinermut isumaqatigiissut tunngavigalugu ilaasoq tamakkiisumik imaluunniit ilaannakortumik AUL-imiunngitsoq ingerlanneqarpat.
§ 5 Pissutsit pisariaqartippassuk pisattat umiarsuup qaavaniitillugit angallanneqarsinnaassapput.
§ 6 AUL uumasunut nassatatut angallassanut akisussaaffeqanngilaq.
§ 7 Ilaasoq toquppat imaluunniit ajoquserpat AUL-ip ilaasumut ataatsimut akisussaaffia 175.000 SDR-init annerusinnaanngilaq.
Imm. 2 Ilaasunik angallassinermi kinguaattoornermut akisussaaffik 4.150 SDR-init annerusinnaanngilaq.
Imm. 3 AUL-ip annaasaqarnernut, soorlu pisattap tammarnera, ajoquserneqarpat imaluunniit kinguaattoorpata annerpaamik imatut akisussaassuseqarpoq:
1) 1.800,00 SDR, ilaasup ataatsip pisataanut tigumiartarissatut nassataanut.
2) 6.750,00 SDR aningaasanut, pappiaqqanut nalilinnut, allanullu nalilinnut, soorlu makkununnga: siilvit, guultit, nalunaaquttat, ujaqqat erlinnartuutit, pinnersaatit aamma eqqumiitsuliat, AUL-imut angalanerup nalaani nakkutigisassanngorlugit tunniunneqarsimappata. Taaneqartut AUL-imut nakkutigisassanngorlugit tunniunneqarsimanngippata, taakkua tammarnerisigut ajoqusernerisigulluunniit AUL taarsiisussatut akisussaasuunngilaq.
3) 2.700,00 SDR ilaasup ataatsip pisataanut allanut.
4) SDR tassaavoq Den Internationale Valutafondimit nalinginnaasumik aningaasanik tigusisoqarsinnaanerannut aningaasat nalingattut atorneqartartoq.
§ 8 AUL annaasaqarnermut pisumut imatut ilanngaateqarsinnaavoq:
1) 20 SDR pisattanik annaasaqarnermut imaluunniit pisattat ajoquserneqarnerannut ilaasumut ataatsimut.
2) 20 SDR kinguaattoorneq pissutigalugu annaasaqaateqarnermut ilaasumut ataatsimut.
§ 9 Ilaasup piffissaq umiarsuarmut ikinissaa sioqqullugu umiarsuarmiillu niunerata kingorna AUL sumulluunniit akisussaassuseqartinneqarsinnaanngilaq. Taamaattoq akisussaatinneqannginnermut ilaanngillat umiarsuarmiit nunamut kiisalu nunamiit umiarsuarmut ikaassuineq, aatsaalli ikaassuineq tamanna bilitsip pisiarineqarnerani bilitsip akianut ilaasutut erseqqissaatigineqarsimappat, imaluunniit ikaassuineq angallammit AUL-ip atorneqartussatut innersuussaanit ingerlanneqarpat.
Imm. 2 Taamaattorli AUL akisussaassuseqartinneqarsinnaanngilaq ilaasoq ajoquserpat, tamatumani aamma pineqarlutik pisattanik annaasaqarneq, umiarsuup angallassissutaasup saniatigut angallatit allat atorlugit angalasoqartillugu, angalaarnerillu taamaattut immikkut pisiarisimagaanni kiisalu bilitsip akianut isumaqatigiissutaareersimasumut ilanngunneqarsimanngippata.
§ 10 AUL nassatanut tigumiartarissanut piffissami ilaasup suli ikinnginnerani, kiisalu piffissami nioreernerani akisussaassuseqartinneqarsinnaanngilaq. Taamaattoq akisussaatinneqannginnermut ilaanngillat umiarsuarmiit nunamut kiisalu nunamiit umiarsuarmut ikaassuinermi, aatsaalli ikaassuineq tamanna bilitsip pisiarineqarnerani bilitsip akianut ilaasimappat, imaluunniit ikaassuineq angallammit AUL-ip atorneqartussatut innersuussaanit ingerlanneqarpat.
§ 11 AUL-ip taarsiinissamut pisussaaffianut tamatigut apeqqutaasarpoq ajoquserneq/annaasaqarneq angallanneqarnerup nalaani arlaanik pisoqarsimaneranik pissuteqarpat, kiisalu ajoquserneq/annaasaqarneq AUL-imit imaluunniit allamit AUL-imit akisussaaffigineqartumit kukkuluttornermik imaluunniit sumiginnaasimanermik pissuteqartumik tamanna pisimappat.
§ 12 Maalaaruteqarneq kiisalu ajoqusiisoqarsimappat tamakku umiarsuup naalagaanut (aquttarfimmut) umiarsuaq qimatsinnagu nalunaarutigineqassapput. AUL-imut piumasaqaat allaganngorlugu umiarsuarmillu nalunaarummik ilallugu AUL-imut nassiunneqassaaq.
§ 13 AUL-imut taarsiiffigitinnissamut piumasaqaat qaangiuttuussaaq AUL-imut eqqartuussisutigut suliassanngortitsineq kingusinnerpaamik annaasaqarfimmit ulloq taanna ilaasup aamma/imaluunniit angalanermi nassatat niuneqarnerannit ukiut marluk qaangiutinnginneranni aallartissimanngippat, imaluunniit nassiussat tammarsimappata ulloq taanna niuneqarfigisimasassaannit ukiut marluk qaangiutsinnagit.
§ 14 Taarsiiffigineqarnissamik piumasaqaat umiarsuup naalagaanut, umiarsuarmi aqumiumut, inuttamut, ikisitsisartumut imaluunniit allanut AUL-ip akisussaaffigisaanut tutsinneqassappat, pineqartoq taanna taakkuluunniit pisinnaatinneqarput AUL-ip akisussaaffeqartitaannginneranut akisussaaneranilluunniit killiliussat assinginik tunngavilersuuteqarnissaminnut.
§ 15 AUL-ip umiarsuaatai kalaallit erfalasuanik erfalasoqartussatut nalunaarneqarput. Sarfaq Ittummi isumannaallisaanermut tunngatillugu danskisut oqaluttoqartarpoq.
§ 16 AUL-ip angallassisarneri pisarput angalanissamut pilersaarutit aamma akit sukkulluunniit atuuttut malillugit, kiisalu aalajangersakkat allanneqarsimasut aammattaaq Imarsiornermi Inatsimmi maleruagassat malillugit. Ilaasunik nassatanillu angallassinermut maleruagassani taakkunani anguniarneqanngilaq ilaasut pisinnaatitaaffiisa annertusarnissaat taamaallaallu tunngavigineqarlutik Imarsiornermi Inatsimmi maleruagassat allamik isumaqatigiissuteqarluni allanngortinneqarsinnaanngitsut.
§ 17 AUL-imik eqqartuussivikkut suliassanngortitsinerit tamarmik Kalaallit Nunaata Eqqartuussiviatigut Nuummi najugaqarfeqartumi taamaallaat ingerlanneqarsinnaapput. Eqqartuussisoqarfinnik allanik atuisoqarsinnaanngilaq.
1 SDR = DKK 9,36 missaannik naleqarpoq; ukioq 2023
