Naalakkersuisut aamma Arctic Umiaq Line 2025-mut aasaanerani umiarsuakkut angallassinissaq pilersinniarlugu isumaqatigiissutigaat. Aasami umiarsuakkut angallassinerit maaji naalerneranit septembari naalerneranut 2025-mi ingerlassapput. Isumaqatigiissuteqartut sinerissami mittarfiit nutaat Uummannap aamma Nanortaliup akornanni kiisalu Qaanaamut immikkut ingerlaartussamik aasami umiarsuakkut suli angallassinernit taperserneqarnissaat pingaartippaat.
Aningaasaqarnermut Akileraartarnermullu Naalakkersuisup Erik Jensenip, Arctic Umiaq Linep aasaanerani umiarsuakkut angallassinissamut pilersaarutimigut, Naalakkersuisut nuna tamakkerlugu takornariaqarnerup iluaqutaanissaanut kissaataa piviusunngortinneranut nuannaarutigaa.
“Politikkikkut kissaatigineqartoq Arctic Umiaq Line A/S-ip ullumikkut piviusunngortimmagu nuannerpoq. Taamaalilluni isorliunerusut ilanngullugit tikinneqartarnissaat timitalerneqartalertussanngormat. Nuannaarutigeqaarput innuttaasut takornarissallu inoqarfinnut amerlanerusunut tikittalernissaat AUL-ip piviusunngortittussanngormagu”, Naalakkersuisoq Erik Jensen oqarpoq.
Arctic Umiaq Linep pisortaa, Jens-Jakob Sandgreen oqarpoq, umiarsuakkut aasaanerani angallassinermut pilersaarut legot atorlugit isumassarsiarineqartoq.
“Nalinginnaasumik Ilulissat avannaani aamma Nuuk kujataani inoqarfinni aqqusaartarnerit akisupput, aammali Ilulissat aamma Nuuk akornanni angalaneq akisuvoq. Tamatumani assigiinngissut tassaavoq, umiarsuakkut angallassinerup kingunerisaattut naleqarnerulersitsineq. Nuuk aamma Ilulissat akornanni angallassinerput ajunngilaq, tamannali Kujataanut aamma Avannaanut iluaqutaanngilaq. 2024-mi umiarsuakkut angallassinissamut pilersaarutitsinnit tamatumani allaanerusunik takornarianik Avannaanut aamma Kujataanut soqutiginninnerusut tunngavigalugit aaqqissuivugut. Tamanna tunngavigalugu 2025-mut aasaanerani umiarsuakkut angallassinissamut pilersaarut tunngaveqarpoq”, Jens-Jakob Sandgreen oqarpoq.
Kullorsuarmut Qaanaamullu angalaneq
Arctic Umiaq Linep business development manageria Mads Mathiassen nuannaarutigalugu oqaatigaa, Qaanaamut Arctic Umiaq Line aqqutigalugu immikkut angalasinnaanissaq august 2025-mi piviusunngortinneqassasoq.
“2025-mi Qaanaamut angalasinnaaneq AUL-imi anguniakkatta piviusunngorneranut ilaavoq, tamannalu tulluusimaarutigaara. Kalaallit Nunaat immakkut ataqatigiissinnissaanut pingaartumik kissaatigaarput, taamaasilluta najugaqartunut aamma takornarianut Kalaallit Nunaanni angalanerat tapersersinnaassagatsigu”, Mads Mathiassen oqarpoq.
Aasaanerani umiarsuakkut angalanissamut pilersaarut AUL-ip nittartagaani takuneqarsinnaavoq, tamatumanilu inniminniisoqarsinnaalluni.
