Arctic Umiaq Line marlunngorneq allorlungu Uummannaq-mut tikittassaaq Juni-miit Oktober ilanngullugu ukioq manna. Uummannamiit Upernavik, Ukkusissat, Saattut aammalu Ikerasak ilanngullugu Nanunnguaq (Targa 37) angalasunik ingerlassisalissaaq.
Arctic Umiaq Line Uummannaq-mi akunnerit arfinillit uninnganerani, Naleraq Seasafari periarfissaq atorluarlugu Illoqarfik aammalu nunaqarfiit qulaani taaneqartut angallassiffingisalissuai, AUL kujammut aallaqqinnginnerani.
Sarfaq Ittuk aqqutingalugu avannamut ingerlaartut Upernavimmut ingerlaqqittussat ualinerani Naleraq Seasafari aqqutingalugu Uummannamiit aallartassapput.
Upernavimmiik kujammut ingerlasussat ullaakkut Nanunnguaq-mut ilaallutik aallartassapput, Uummannamut tikissallutik ullup qeqqata missaani. Kujammullu Nanortallip tungaanut ingerlaqqittussat Sarfaq Ittuk-mut ilaallutik ingerlaqqissapput aqqutaanilu najungaqarfiit 17-nit aqqusaarneqarsinnaallutik.
Periarfissaavoq aamma Ilulissaniit Upernavimmut toqqaannaq ingerlanissaq, ulloq sioqqullugu Nanunnguup (Targa 37) Uummannamut ingerlaannginnerani, aammalu Upernavimmiit Ilulissanut toqqaannaq periarfissaassooq aqanguani Nanunnguaq Uummannamiit Upernavimmut ingerlassereerpat.
Arctic Umiaq Line pisortaa Jens-Jakob Sandgreen suleqatigiinnissaq pillugu imatut oqaasertalerpaa:
“Una suleqatigiinnissaq sivisuumik eqqarsaatigisimavarput, apeqquterpaalunnik imaqarluni. Anginerungutta naqisimaneqarnerussuugut. Uagut neriuutigivarput nunatta annertussusaa naapertorlugu nunarput aammalu nunaqavissut ineriartortuarnissaat. Aalisarneq ukioq kaajallugu inuussutissarsiutigineqartartoq sanilliullgu, takornariaqarneq arlalinnik assigiinngittunik aporfeqarsinnaasarpoq. Takornarissat aalisakkatut aaneqarsinnaanngillat, taamaattumik angallassisartunut siunissaq takorlooruminaassinnaalluni, annermik Nuuk avataani angallassinermik suliaqartunut. Suleqatigiinneq imatut ittoq, takornarialerineq eqqarsaatigalungu ineriartornissaanut siuariartorsinnaaneranut sunniuteqarsinnaalluarpoq, Umiarsuup nunatta illoqafii kommune-t tallimaninngaanneersut tikittarpat, taamaasilluni sineriammi inuiaqatigiinni sunniuteqarsinnaalluni.”
Naleraq Seasafari-mi piginneqataasoq Heidi Jensen suleqatigiinnissaq imatut oqaluttuaraa:
“Nuannarutigaarput suleqatigiinnissamut isumaqatigiikkatta. Nunaqavissut suliffiuteqartugut uagutsinnut isumaqartorujoovoq, sinersortaat suleqatigalugu maani avannaani tikissinnaasagut amerlissammata. Uiga uangalu, neriuutigivarput uumap suleqatigiinnerup takutissinnaangaa, sumiiffinni assiginngittuni nunaqavissut qanoq suleqatigillutik ineriartortitsisinnaanerat. Maani avaanni suleqatigiinneq annertooq malugisinnaavarput, tassami Uummannami eqqaanilu Uummannaq Seasafari-p misigisassarsiortisineq pingaartimmassuk, uangullu pingaartillugu piffimmiit piffimmut angallassinissaq ullormi tassani, aammalu Hotel Avani eqqissisimaarfissanik peqarlutik. Piareersimavugut ikiuunnissamut.
Inniminniineq Arctic Umiaq Line inniminniisarfia nutaaq aqqutigalugu inniminniisoqarsinnaavoq, aammalu Sarfaq Ittuk, Nanunnguaq angallassinissaat takuneqarsinnaaput uani “Tidsplan”. Angallassinermuti isumaqatigiissut atuutissooq Juni-miit Oktober-imut 2024.
