Arctic Umiaq Linep piunermini ineriartornerminilu anguniagaq, takorluugaq aamma tunngaviusumik naleqartitat arlaqartut tunngavigai. Taakkulu ingerlatsiviup ulluinnarni pilersitsineranut tunngaviupput pingaaruteqarluinnartuusut.
Anguniagaq
Uagut anguniagarput tassaavoq pisisartutsinnut neqeroorutigissallugit umiarsuarmut bilitsit akii unammillersinnaasut aamma pilerinartut, takornarianut aamma maanimiunut angalasunut nuannersunik misigisaqartitsinissaq aammattaaq takornariaqarnermi ineriartortitsisutut ingerlanissaq, kiisalu pisortanut aamma inuussutissarsiutinik ingerlatsisunut Kalaallit Nunaanni aamma eqqaani suleqataanissaq.
Takorluugaq
Uagut takorluugarput tassaavoq umiarsuakkut ilaasunik angallassinerup pitsanngortinneqarnissaa, tamatuma Kalaallit Nunaanni angalanissamut pilerisunneq aamma ujartuineq annertusassavaa. Tamani siunniunneqassaaq pisisartutta pitsaanerpaamik misigisaqarnissaannik qulakkeerinninneq.
Naleqartitat
Arctic Umiaq Line suliaqarpoq tunngaviusumik naleqartitat sisamat aallaavigalugit: Niuernerpalaartumik eqqarsarneq, peqatigiilluni ajornartorsiutinik aaqqiineq, paasiuminartumik sullissineq aamma ataqqeqatigiilluni isertuanngitsuuneq.
Arctic Umiaq Linemi ajornaatsumik aamma ataqatigiissumik suliffeqarfitta aaqqissuussaaneranut aaqqiisarpugut, tamatuma pisinnaalersippaatigut pisisartut pillugu periarfissarsiornissatsinnut aamma unammisinnaanitsinnut. Uagut pisisartunut sammisuuvugut aamma aningaasartuutinut eqeersimaartuulluta. Anguniakkavut angusarpagut aalajangiisarnitsinnut tunngavigalugit suna pisisartutsinnut pitsaanerunersoq, ingerlatsivimmut aamma uagutsinnut namminermut – taamatut tulleriisillugit.
Peqatigiilluni ajornartorsiutinik aaqqiineq
Ajornartorsiutinik aaqqiisarneq ulluinnarni sulinitsinni ilaavoq. Suliassat imaluunniit ajornartorsiutit toqqorneqartanngillat, puigorneqartanngillat imaluunniit allanut suliassanngortinneqartarnatik, ingerlaannartumik aaqqinneqartarput (tamanna ajornanngikkaangat). Ajornartorsiutit takkukkaangata pitsaanerusumik aaqqiivigisinnaavagut suleqatigiinnikkut, piumasarineqarpat ullaakkut makiaartarpugut kingusissukkullu innartarluta. Nutaaliornissamut, unamminartumut aamma isummanik saqqummiusseqatigiittarnissamut inissaqartitsivugut, taamaalilluta suleqatitsinni pitsaanerpaaq takutissinnaalerlugu.
Paasiuminartumik sullissineq
Sullissineq ataqqineqaatissaavoq – tunniussaqarutta apeqqutaatinnagu pisisartumut imaluunniit suleqammut ilungersortarpugut. Ajornanngitsumik tikinneqarsinnaanerput qaffasinnerpaamiippoq kiisalu uagut pissuserisarput takutittarparput – pitsaasoq isiginiartarparput, aammattaaq pisuni artornarsinnaasuni, suut tamaasa aqqutigalugit inuit ataatsimoortinniartarpagut pitsaasumillu sullinneqarsimaneq malunnartinniartarlugu.
Ataqqeqatigiilluni isertuanngitsuuneq
Ataqqinnilluta pisisartugut tusaaniartarpagut aamma immitsinnut – arajutsinaveersaartuuvugut, inussiarnisaartuulluta, ilumoortuulluta aamma maniguuttuulluta inunnut imaatigut angalanissamik toqqaasimasunut, suleqatitsinnut imaluunniit uagut peqatigaluta sulisunut. Siunertarisavut aamma pilersaarutigut pillugit immitsinnut tatigaagut. Ingerlatseqatigiiffiup aningaasaqarnerata aamma aaqqissuussaanerata qanoq inissisimanera pillugit ammasumik ilumoortumillu paasissutissiisarpugut ajornartorsiutinillu aaqqinniarnitsinni suliffeqarfimmi amerlanerpaat akuliutsittarlugit.
