Arctic Umiaq Linep aamma Hurtigruten Norgep angalasut Kitaata sineriaata attorneqanngitsup pikkunartuanik misigisassarsiornissaannut periarfissiisumik immikkut ittumik suleqatigiinnissartik tulluusimaarutigalugu nalunaarutigaat. Tikeraat nutaanik misigisassarsiorusuttut nuannerluinnartumik misigisaqarnissaannut neriorsuuteqarfiusumut peqatigiilerneq immikkuullarissumik periarfissiissaaq.
Arctic Umiaq Linep aamma Hurtigruten Norgep akisussaassusilimmik piujuartitsinissarlu tunngavigalugu angalatitsisarnermik suliaqarnermikkut ataatsimoorfigisartik aallaavigalugu suliamut paasisimasaqarluarnertik kattullugu angalanissamik aaqqissuussaqarput nalinginnaasumik takornariartitsisarnermit amerlanerungaartunik neqerooruteqarfiusumik.
Angalanerit assigiinngitsut pingasut toqqagassaapput, tamarmillu immikkut MS Sarfaq Ittummut ilaalluni Kitaata sineriaata misigisassarsiorfiginissaanut qaqutigoortumik periarfissiillutik.
Arctic Umiaq Linep pisortaanera, Jens-Jakob Sandgreen, nuannaarluni ima oqaaseqarpoq: “Hurtigruten Norgemik suleqateqarnerput tulluusimaarutigeqaarput. Arctic Umiaq Linep najukkami inuiaqatigiinnik aalajaalluni sullissineranut peqatigitillugu Nunatsinni piujuartitsinissaq tunngavigalugu takornariartitsinikkut suliaqarfiup sanarfineqarnera siuttuuffigilerparput, tikeraallu nunanit tamalaaneersut tikilluaqqunerisa saniatigut aamma najukkami pingaarutilimmik naleqarnerulersitsinissaq qulakkeerneqassaaq najukkami suliffeqarfiit mikinerusut suliffeqarfimmillu aallarnisaasut suleqatigalugit nunami angallassisarnikkut kiisalu unnuinertigut nerisaqartitsinikkullu.”
Naapeqatigiilluarnissamut aqqutissiuussineq
Arctic Umiaq Linep aamma Hurtigruten Norgep issittumi inuiaqatigiinnik avinngarusimasunik sullissisartuupput akisussaassusilimmillu angalatitsinernik takornariartitsinernillu siuarsaanermut tunngatillugu maligassiuisuullutik.
Kitaata sineriaani mittarfiit nutaat pingasut 2024-p 2025-llu akornanni ammarneqartussaammata, taakkunanngalu marluk nunani tamalaani mittarfiussallutik, piviusumik misigisassarsiornissamut nutaarluinnarmik periarfissaqalissaaq, tikeraat nunarsuup immikkoortuanut alutornarluinnartumut atassusernissaannut periarfissiisussamik.
Hurtigruten Norgep pisortaanera, Hedda Felin, ima naqissusiivoq: “Sinerissat ilisarnarluartut atuarlugit angalaneq annertuumik misilittagaqarfigigatsigu sinerissat inuillu taakkunani najugaqartut illersorsinnaavagut, tamatumunngalu peqatigitillugu aamma ilaasutsinnut misigisassanik asseqanngitsunik neqerooruteqarsinnaalluta. Nunarsuaq tamakkerlugu attaveqarfigisagut aqqutigalugit Kalaallit Nunaata kitaata sineriaani pisuussuterpassuit inunnit amerlanerusunit misigisaqarfigineqarnissaat sulissutigaarput.”
Kalaallit Nunaata pikkunartuata misigisassarsiorfiginera
Angalanerni tikitassat kisiisa pineqanngillat, aammali Kalaallit Nunaata Kitaata sineriaani inuunerup misigisassarsiorfiginissaa pineqarpoq. Nunaqarfiit aqqusinernik atassuserneqarsimanngimmata Arctic Umiaq Line inuuniarnermut pingaaruteqarluinnartumik ukiuni 250-ini inissisimasimavoq. Angalanerit misigisassarsiorfiulluartut pingasut atorlugit tikeraat ilaasut nunaqavissut peqatigalugit tuluttullu oqaasilimmik angallassisulerlutik inuiaqatigiinni avinngarusimasuni sinerissamilu kulturimik qanimut misigisaqartinneqassapput.
“Angallassisarnitsinni inunnik allanik naapitsisarnerit takusassaqqissutuulli pingaaruteqartigipput. Angallassinerit piviusuupput Arctic Umiaq Linellu ilaasorisartagai quliugaangata qulingiluat tassaasarput nunaqavissut,” Jens-Jakob Sandgreen taama oqaluttuarpoq.
Angalanerit allanit nallerneqarsinnaanngitsut
Arctic Umiaq Linep aamma Hurtigruten Norgep angalanerit puiunaatsut assigiinngitsut pingasut suleqatigiissutigalugit neqeroorutigaat:
- Kalaallit Nunaanni angalaneq tamakkiisoq: Kalaallit Nunaanni angalaneq tamakkiisoq ullunillu 14-inik sivisussuseqartoq Kalaallit Nunaata kitaata sineriaanik misigisassaqarfiunerpaavoq. Angallavik aamma nunaqavissut atortarpaat Kalaallit Nunaata kujasinnerusuanut avannarpasinnerusuanullu angalassagaangamik. Nuup mittarfianut siumut utimullu nunani tamalaani timmisartukkut angalanerit.
- Kalaallit Nunaata avannarpasinnerusuanut angalaneq: Kalaallit Nunaata avannarpasinnerusuanut angalaneq unnunnik arfineq pingasunik sivisussuseqartoq illoqarfiit pingaarnersaannit Nuummit aallartiffeqarpoq Kangerlussuatsiarlu aqqusaarsinnarlugu Uummannap qeqertaanut ingerlassalluni aammalu Qeqertarsuup tunuani Ilulissat Kangia UNESCO-mit nunarsuarmut kingornussassanngortitaq takusassarsiorfigineqassaaq.
- Kalaallit Nunaata kujasinnerusuanut angalaneq: Kalaallit Nunaata kujasinnerusuanut angalaneq unnunnik arfinilinnik sivisussuseqarpoq Nuullu eqqaani kangerlummi Camp Kangiusami unnuinermik glampingimik taaneqartartumik aallarnerneqassaaq kingornalu aamma Igalikumi UNESCO-mit nalunaarsorneqartumi unnuisoqariarlunilu Qaqortumut ingerlaqqittoqassalluni.
2024-mi periarfissaq immikkuullarissoq
2024-mi angalanissamut immikkut illuinnartumut tikeraat malunnaatilimmik akikillisaavigineqarnissamik neqeroorfigineqarput inummut ataatsimut 9.600 DKK-it tikillugit, 2024-mi juunip oktobarillu akornanni angalanernut aalajangersimasunut 2023-mi novembarip aallaqqaataa nallertinnagu Arctic Umiaq Linep juniorsuiteanik inniminniinikkut.
Arctic Umiaq Line aamma Hurtigruten Norge pillugit
- Arctic Umiaq Linep imarsiornermi oqaluttuassartaa ataqqinneqartoq 1774-imi aallartippoq Kalaallit Nunaata kitaata sineriaani atassuteqaataalluni ilaasullu nassiussallu kujataani Narsamit avannaani Ilulissanut angallassinissaat qulakkeerinneqataaffigalugu.
- Hurtigruten Norge ukiunik 130-rsuanik oqaluttuassartaqartoq Norgep sineriaani alutornartumi Bergenimit Kirkenesimut najukkami inuiaqatigiinnik sullissisarnermigut kulturikkut nukittuunik atassusiisarsimavoq.
