Arctic Umiaq Line 2023-mi angallassinissaminut piareersaateqarluni akit ilusiligaanerat nutaaq atulersissavaa Suitenillu neqerooruteqalerluni. Ingerlatseqatigiiffiup billetsinut akigititani 2014-imiilli aningaasat naleerukkiartornerinut naleqqussarsimanngilai 2023-milu angallassileruni uuliamut akit qaffangaatsiarsimasut atortussanngorlugit, akilli ilusiligaanerisa allanngortinnerisigut akinik qaffaarujussuarnissaq pinngitsoortinneqassaaq umiarsuarmilu ilaasut inaat parnaartartut atorluarneqarnerunissaat ukkatarineqassalluni.
”900 koruuneerluni Sisimiunit Nuummut Ilulissanulluunniit, paarlattuanilluunniit, inunnut sisamanut uffartarfilimmik perusuersartarfilimmillu immikkut ineqarluni, nerinerillu marluk kingorna illoqarfiup qeqqanut tikinneq. Ikinngutigiit Nuummeersut tallimanngornermi unnukkut aallarsinnaapput Avannaanilu Sisimiuni sapaatit akunnerata naanera sivitsorlugu nunatsinni nunap timaani nuannisarfissat pitsaanerit ilaanniissinnarlutik ataasinngornermi unnukkut kingusissukkut umiarsuarmut ikeqqissinnarlutik, marlunngornermi ullaakkut siulliit ilaattut suliartoqqissinnaapput, inunnut sisamanut parnaartartumi ineqarluni inummut ataatsimut siumut/utimullu 1.800 kr.-ilerlugu. AUL ilaasumut ataatsimut umiarsuarmi inimik parnaartartumik ataatsimik, inummut ataatsimut timmisartumi issiavinnik sisamanik neqerooruteqarnermut assersuunneqarsinnaasumut, neqerooruteqarluni unammillersinnaanngilaq. AUL-ili angalaqatigiit umiarsuarmi ineqatigiillutik angalanissaannik, kangerlummi illuaqqami qanigisat unnueqatiginerinut assersuunneqarsinnaasumik, neqerooruteqarsinnaavoq,” pisortaaneq, Jens-Jakob Sandgreen, oqaluttuarpoq.
Angalaqatigiit amerlanngitsut kisimiillutik angalasunit akikinnerusumik angalasinnaapput
Akit nutaamik ilusilerneqarnerisigut ilaasunut 1-2-nut inimut parnaartartumut billetsimut akigitinneqartoq +7,1%-inik qaffanneqassaaq ilaasunullu 3-4-nut inimut parnaartartumut billetsimut akigitinneqartoq -8,3%-inik appartinneqassalluni. Ilulissat Nuullu akornanni ingerlaarfimmi ilaasunut 3-4-nut inimut parnaartartumut billetsimut akigitinneqartoq 31%-inik apparneqassaaq – ingerlaarfimmilu Qaqortoq/Narsaq – Nuuk akigitinneqartoq -23%-inik apparneqassalluni. Arctic Umiaq Line meeqqanut suli ukioqalinngitsunut akeqanngitsumik billetseqartitsisarpoq 1-11-nik ukiulinnut -50%-inik akikillisaasarluni, utoqqalinersialinnullu piffissami angallaviunnginnerusumi -50%-inik akikillisaasarpoq piffissamilu angallaviunerpaasumi -25%-inik akikillisaasarluni.
”AUL ukiuni atuuffigisamini 248-ni Nunatsinni innuttaasunik angallassisuuvoq nunarsuullu maannakkorpiaq aalassassimaarfiunerani aningaasat naleerukkiartungaatsiarnerannut innuttaasut illersorneqarnissaat pingaartipparput. Aappariit atuartumik naalungiarsummillu qitornallit akit ilusiligaanerat nutaaq atorlugu, assersuutigalugu Ilulissanit Sisimiunut apersortittup nalliuttorsiutigineranut peqataajartorsinnaapput parnaartartumi immikkut ineqarlutik ilinniagaqarnermusiamik affaata nalinganut, aallarfissartillu nalunaaquttap akunnerinik marlunnik sioqqullugu angalanissamik allanngortinnissaanut periarfissaqarlutik,” pisortaaneq, Jens-Jakob Sandgreen, oqaluttuarpoq.
Billetsit Killilikkat aamma Eqaatsut
Arctic Umiaq Line billetsit Killilikkat aamma Eqaatsut atulersinniarpai, billetsi Killiligaq aallarfissaq nalunaaquttap akunnerinik marlunnik sioqqullugu allanngortinneqarsinnaalluni, angalanissamik taamaatitsinermi billetsip akiata affaa utertinneqarsinnaalluni takkutinngitsoornermilu akiliutinik utertitsisoqarsinnaanani. Billetsi Eqaatsoq ilaasumut ataatsimut 90 kr.-inik ilassutitut akiliutaavoq, billetsilu aallarfissaq nalunaaquttap akunnerinik marlunnik sioqqullugu allanngortinneqarsinnaalluni, angalanissamik taamaatitsinermi billetsip akia tamaat utertinneqarsinnaalluni takkutinngitsoornermilu akiliutit affaat utertinneqarsinnaallutik.
”Sarfaq Ittuk sinersortaataavoq anginngitsoq, siusissukkullu inniminniisoqarsimatillugu tamanna angalanissaminnik pilersaartut inissaqartinnissaannut killiliisarpoq. Aallarfissaq nalunaaquttap akunnerinik marlunnik sioqqullugu angalanissamik taamaatitsisarnerit akeqanngitsut AUL-imut ukiut tamaasa aningaasanik arfineq marlunnik kisitsisitalinnik annaasaqarfiusarput, akiliutinillu utertitsinerit kisiisa pineqarput, ilaasussaraluanillu inissaqartinneqanngitsunit kaaviiaartitassaraluit matumani ilanngunneqanngillat. Taamaammat ingerlatseqatigiiffimmut pissusissamisoorpoq immikkoortunik billetseqartitsissalluni, ilaasussanut naatsorsuutigineqarsinnaasunut sunniuteqanngitsumik,” pisortaaneq Jens-Jakob Sandgreen oqarpoq.
Sarfaq Ittuk Suiteqalissaaq
Arctic Umiaq Line Suitet assigiinngitsut marluk 2023-mi angalaffiusumi atulersissavai, suite ataaseq taaguuteqarluni ”Umiaq Junior Suite” ini parnaartartoq nalinginnaasoq angeqqatigalugu ”Igdlo Suite”-lu marloriaammik anginerulluni. Umiaq Junior Suite inunnut marlunnut inimut parnaartartumut nalinginnaasumut naleqqiullugu 500 kr.-inik akisuneruvoq inullu ataasiinnaappat 1.000 kr.-inik akisunerulluni, Igdlo Suitelu inunnut marlunnut inimut parnaartartumut nalinginnaasumut naleqqiullugu 1.500 kr.-inik akisuneruvoq inullu ataasiinnaappat 2.000 kr.-inik akisunerulluni.
”Suiteqalernitta siunissamut siusissukkut appakaatsissavaatigut, paasiniagassagut ilinniagassagullu suli amerlammata, ilaatigut angalanermut pilersaarutit nutaat pillugit. Siunissami sullitariumaakkavut pillugit qanittumik eqeersimaartumillu paasiniarnissaat, sullitat pitsaasunik misigisaqartinnissaannik naatsorsuutigisaannillu naammassinninnissamik kinguneqaannarani aamma sinerissami najukkani inuussutissarsiutinik ingerlataqartunut pitsaasumik atassuteqalersitsissaaq. Tamatumunngalu peqatigitillugu neriuutigaara suitet sulinermut atatillugu angalasunit atorluarneqalerumaartut kommunit tallimaasut tamaasa sapaatit akunnerata affaa atorlugu tikinneqarsinnaammata, pikkorissartitsinissamut/aaqqissuussinernut periarfissat ilanngullugit,” – pisortaaneq, Jens-Jakob Sandgreen, taama naggasiivoq.
Niuerfimmi inissisimaffik nutartigaq
Visit Greenlandip takornariartitsisarnerup Nunatta sineriaani siammarneqarnissaanik kaammattuutigisaa Arctic Umiaq Linep suleqataaffigisinnaassallugu neriuutigaa, sumiiffinnimi taakkunaniipput nunarsuarmi neqeroorutit immikkuullarissut sumiiffinnilu avinngarusimasuni takornariartitsinikkut suliniutaasut, Nuummitut unammilleqatigiiffiunerusunut naleqqiullutik niuernikkut nutaamik toqqammavissaqalertut.
”Maanna angalanermut pilersaarutigisarput tunngavigalugu takusinnaavarput illoqarfiit tallimat tamarmik immikkut angalasoqarfiunerusartut Ilulissanut naleqqiullugit, naak Ilulissat takornarianit ornigarneqarluartaraluartoq. Paasissutissaatitta takutippaat sumiiffiit mikinerusut sivikitsuinnarmik tikeraarneqartartut. Ilulissat umiarsuup utimut kaajallaffigisarpaa sapaatit akunneri tamaasa tikittarlugu, illoqarfiilli amerlanerit sapaatit akunnerannut marloriarlugit tikinneqartarput. Paasissutissaatittalu takutippaat sapaatit akunnerat ataaseq illoqarfimmiinnermut sivisusoq, sapaatilli akunnerat ataaseq Nunatsinniinnissamut sivikippallaartoq. Sumiiffimmi immikkuullarissunik neqeroorutaasut piffissami sivikitsumi misigisaqarfigineqarsinnaapput, misigisassalli tamanit atorneqarsinnaasut soorlu qimussernerit, qaqqami sisorarnerit, umiatsiarnerit, SUP-it pisuttuarnerillu najukkami takornariartitsinermik inuussutissarsiuteqartut suleqatigalugit sinerissamut siammarneqarsinnaapput. Tamannalu siunissaq eqqarsaatigalugu eqqumaffiginiarparput,” pisortaaneq, Jens-Jakob Sandgreen, naggasiivoq.
