Ukiaq una Arctic Umiaq Line atorlugu inuit 403-sut Ilulissap avannaani pingasoriarluni aqqusaarnerani angalasimapput. Pingasoria kaajallaanermi silagissiorfiusimavoq timmisartutigut unittoortoqarsimanani, sooq ukiami AUL-miit misilittaanerit ersarissutut isigineqartut. Immikkuullarippoq Ilulissap avannaani angalasut 2/3-ai Uummannaq aamma Upernavik aallartiffiginagulu niuffigisimanngikkaat, kisianni tikeraarusullutik kaajallaasut.
AUL ukiaq una akunnerit arlallit uninnganerit tikiffinni aaliangersimasuni misilittarpai, sivisuumillu angalaffiit unnuarnut inississornerullugit, sinilluni angalanertut oqaasertalerlugit. Angalariaatsit marluk ukiaq una misilittaanertut kattusimaneqarsimapput, ullut 14-kkaartoq sivisuumik uninngasartoq Nanortaliup Upernavillu akornani aamma ullut 7-kkaartoq ingerlaannaq avalaqqinniartartoq Qaqortup Ilulissallu akornani.
“Arctic Umiaq Lineup sineriammut isumaa nutarsarsinnaanissaanut periarfissai misilittarpagut. Akunnerpassuit angalareerluni minutsit 15-innaat uninngallatsiarneq, akunnerit arlalinnik taarserlugit misilittaavigaarput. Allannguinerup ilaasutigut ersarissimavoq, kaajallaallutik nunaqqatigut takornariartut suliartortullu, apuuffinni unnuinngikkaluarlutik, kisianni ullortik atorsinnaasimallugu. Sineriammi innuttaasut inuussutissarsiortullu aamma sullissinnaalernerat ersarissimavoq.” Arctic Umiaq Lineup pisortaa Jens-Jakob Sandgreen oqarpoq, nangillunilu:
“Sivisunerusumik uninnganerit malunnartumik naleqarteeriartitsinnut sunniisimapput, assersuutigalugu innuttaasut umiarsuarmukarlutik pisiniartarsimapput neriniartaffittaanilu nerillutik ataatsimiittarsimaluutik, saniatigullu takornarialerisut takornariat sullittarlugit, umiarsuup uninnganerani. Isumaqartilluarparput qanoq inuuffiusoq uummarillinerusarnersoq najorniarlugit piffissaqarfigileraangatsigit. Sunneeriaat taanna siunissap tunniussinnaasaanut takutitterpasippoq, A-miit B-mukarnissaq sammiinnarnagu, kisianni alfabet tamaat sammillugu. Umiarsuarmi inuit 200-rut sinnerlugit unnuisinnaapput, angalasut takornariallu sulliinnanngikkaluarlugit, angalanngittut aamma sullinneqarsinnaanerat malunnarsivoq. Umiarsuaq atorluarlugu sineriammi innuttaasut inuussutissarsiortullu najorlugit kivitseqataalernerusinnaaneq soqutiginarluinnartutut isigaarput.” Jens-Jakob Sandgreen naggasiivoq.
Ullut 14-kkaarnermi Qasigiannguit inunniit 105-nik ilaasoqartitsilersimavoq, Kangaatsiaq 43-nik Narsarsuarlu/Nanortalillu 51-nik. 2024-mi ullut 14-kkaarneq juunip aallaqqaataaniik oktobariup 19-anut Uummannap Nanortaliullu akornani naliginnaalissaaq.
