Arctic Umiaq Line suliffeqarfiit tusaamaneqarluartut Royal Greenland, KNI aamma Royal Arctic Line pilersinneqarnerannut ilaavoq, ukiunilu 250-ini tulluusimaarutigalugu Kalaallit Nunaat sullillugu. Oqaluttuarisaanerput 1774-imi aallartippoq, Hans Egedip suliffeqarfiutaata piujunnaarnerata kingorna Kalaallit Nunaannit niueqatigiinnermik aallarniisimasumit Jacob Sewerinimut “Grønlandsfarten” danskit naalagaaffiannit tunniunneqarmat. Tamanna piffissami Kalaallit Nunaata imartaani Norgemit, Englandimit, Tysklandimit, Hollandimillu umiarsuaqaleruttornerata nalaani pivoq.
1789-imi pisortarput, Jens Wille tuluit umiarsuaasa Kalaallit Nunaata sineriaani amerliartulermata sumiiffinnilu najugallit umiarsuaannut akulikittumik pulaartalermata unammilligassaqarsimavoq. Unammilligassaq taanna aaqqiiviginiarlugu kingusinnerusukkut pisortatsinnit B.J. Schultzimit allaanerusumik ilisarnaasiinikkut “erfalasoq unaartalimmik” ilisimaneqartumik kiisalu inuttat naalakkatut atisalersorneratigut suliffeqarfitsinnik pilersitseqqinnissaq aalajangerneqarpoq. Taamatut iliorneq Kalaallit Nunaanni umiarsiarnut allaninngaanneersunut oqartussaanitsinnik aallarniivoq, oqaluttuarisaanitsinnilu piffissaq nutaaq aallartilluni.
1793-imi siulittaasutsinnit pisortatigoortumik erfalasumik unaartalimmik atuineq akuersissutigineqarpoq, 1795-imilu qallunaat naalagaaffianit oqaluttuarisaanitsinni tanngassimaarnartumut ilisarnaatitut isigineqalerluni. Ullutsinni erfalasoq unaartalik nunarsuarmi ilisarnaatit pisoqaarnersat ilaanniippoq, sulilu Arctic Umiaq Linemit pigineqarluni.
2024 uatsinnut ukiuuvoq immikkuullarissoq, Kalaallit Nunaata sineriaani atugarissaarnermik pilersitsisumik umiarsuaateqarfittut ukiuni 250-nngortorsiorfiummat. Nalliuttorsiorneq Kalaallit Nunaanni tunniusimanitsinnik siunissamillu aamma pissanganartumik ilusilersuinermi sulinitsinnik nalliussineruvoq.
Ukiuni 250-ini kingullerni ilikkarsimasarput tassaavoq naak pisimasut isumalerujussuugaluartut siunissaq suli annertunerusumik isumaqassaaq. Tamanna siunissami kinguaariit sullinnissaannut tunniusimanitsinnik eqqaasitsissutaavoq, taamaasillutik massakkut piffissamiit pitsaanerusumik atugaqarniassammata. Siunissami Kalaallit Nunaat sullisissallugu aamma sineriammi inuiaqatigiit nukittuut piujuartitsisullu qulakkeernissaat anguniagaraarput.
